Градоначалникот на општина Василево г-дин Ванчо Стојанов, традиционално на првачињата од општина Василево им подари новогодишни пакетчиња. Со желби за добро здравје, успех во учењето и исполнување на сите детски желби,  градоначалникот Стојанов заедно со претседателот на општинскиот совет Драги Митев  им ги разубавија престојните Новогодишно-Божични празници на најмалите ученици – првачињата.  Преку песнички за Новата година, за зимата, за првиот снег….дечињата му посакаа среќна Нова година на градоначалникот и му се заблагодарија за подароците.

На денешната редовна 49-та Седница, Советот на општина Василево го донесе Буџетот за наредната 2017 година кој изнесува вкупно 224 010 000 денари. Основниот Буџет пак изнесува 130 900 000 денари. Образложение за Буџетот даде градоначалникот на општина Василево г-дин Ванчо Стојанов.  Советниците од СДСМ и НСДП  по овој предлог гласаа воздржано. Воздржано гласаа и за Финансиските планови на детската градинка и  двете основни општински училишта „Гоце Делчев“ и „Атанас Нивичански“ , Програмата за работа на ЈПКД „Турија“ и Предлог-одлуката за извршување на Буџетот на општина Василево за 2017 г.

На оваа седница Советот ги усвои и предложените програми за работа на општинските инспектори за: образование, за даноци и такси, градежниот инспектор  и инспекторот  за комунални работи за наредната 2017 година. Со одлука на Совет на денешната седница, на ЈПКД „Турија“ од Василево  на користење и управување му е пренесен водоснабдителниот систем за с. Требичино.

Советниците донесоа и три одлуки за доделување финансиска помош на тројца граѓани од општина Василево.

По повод 20 годишнината од основањето на општина Василево, во петок, 16.12.2016 година, со почеток во 12,00 часот, Советот на општина Василево ќе одржи свечена Седница.

Седницата ќе се одржи во салата на хотелот „Мис Стон“ во Василево.

Едногласно,  на вчера одржаната  48-ма седница, беа донесени две нови одлуки за реализација на проекти кои ќе значат развој на општина Василево.  Финансиско учество на општина Василево  во изработка на техничка документација за водоснабдување на населените места Требичоно и Дукатино и финансиско учество на општина Василево  во изградбата на дел од локалниот пат Чанаклија Нова Маала, се двете предлог-одлуки кои по образложението дадено од градоначалникот на општина Василево, г-дин Ванчо Стојанов, беа едногласно донесени.

Со вкупен износ од 80 000 денари општина ќе учествува во изработката на техничката документација за водоснабдување на Требичино и Дукатино – проект за кој 800 000 денари се обезбедени од Бирото за регионален развој.

Финансиското учество на општина Василево во изградбата на локалниот патен правец Чанаклија – Нова Маала изнесува 1 800 000 денари, додека поголемиот дел од средствата односно 8 000 000 денари општината ги обезбедеи од  Бирото за регинален развој.

„Реализацијата на овие два проекти е во насока на континуираниот развој на општина Ваилево“, е ставот на предлагачот на одлуките – градоначалникот на општина Василево г-дин Ванчо Стојанов.

Во понеделник, 12.12.2016 година, со почеток во 15,00 часот, Советот на општина Василево ќе ја одржи редовната 48-ма седница. За работа на седницата предложен е следниот дневен ред:

1. Предлог-одлука за сопствено учество на општина Василево во проект за изработка на техничка документација за водоснабдување за населените места Требичино и Дукатино.
2. Предлог-одлука за сопствено учество на општина Василево во проект за развој на патната инфраструктура преку изградба на дел од пат помеѓу населените места Чанаклија и Нова Маала.

Седницата ќе  се одржи во просториите на Домот на културата во Василево.

По повод Новогодишно-Божиќните празници, во организација на ФК „Василево“, а под покровителство на општина Василево, се организира традиционалниот Новогодишно-Божиќен турнир во мал фудбал.

Пријавувањето на екипите е во тек и ќе трае до 15.12.2016 година до 18,00 часот. Котизацијата за учество е 5 000 денари, а вкупниот награден фонд изнесува 200 000 денари. Турнирот ќе започне на 16 декември 2016 година. Натпреварите ќе се играат во спортската сала на ООУ „Гоце Делчев“ во Василево. Заинтересираните екипи  подетални информации може да добијат кај лицето за контакт Александар на  телефонскиот број 072 277 187.

Општина Василево, преку Ценатрот за развој на Југоисточниот плански регион обезбеди средства за асфалтирање на еден километар од локалниот пат Чанаклија – Нова Маала.  Според информацијата од градоначалникот на општина Василево г-дин Ванчо Стојанов, на денешната 24 седница на ЦРЈИПР одлучено е средствата кои Центарот ги обезбеди преку  Бирото за регионален развој да бидат наменети за асфалтирање на локалниот пат Чанаклија  – Нова Маала. Станува збор за сума од 8 000 000 денари,  а остатокот до неопходните 9 700 000 денари односно средства во висина од 1 700 000 денари општината ќе ги обезбеди од сопствените приходи. Вкупната должина на овој локален пат е 3,9 км,  од кои досега се асфлтирани 1 км а изграден е и еден мост.

„Асфалтирањето на овој пат има посебно заначење за општина Василево не само поради тоа што општината се поврзува со соседните општини Босилово и Струмица, туку и поради урбанизација на површините на потегот  Чанаклија – Нова Маала“,  потенцира градоначалникот Стојанов.

Општина Василево е една од дваесетте општини од Р.Македонија избрани да бидат учесници во дипломатско детската манифестација „Македонија во ритамот на Европа“, која е поддржана од амбасадорите на Европа и Европската Унија. По тој повод,  денес, градоначалникот на општина Василево, г-дин Ванчо Стојанов,  оствари средба со директорот и извршниот директор на „Црна Гора во ритамот на Европа“ г-дата Давид Макевич и Игор Карадаревич на која подетално беше запознат со обврските на општината во подготовките на нејзиниот претставник. Целта на манифестација „Македонија во ритамот на Европа“, е поттикнување, развивање, препознавање и зачувување на младите таленти, промоција на интеркултурализмот, толеранција, рамноправност на полови, почитување на човековите права, различностите, соработка и доживотно учење. Манифестацијата секоја година се одржува во земјата победник од претходната година. Во 2017 година ќе се одржи во Скопје. Децата кои ќе ја претставуваат својата општина, ќе се претстават со изведба на јазикот на земјата чии амбасадор ќе биде определен за соработка со конкретната општина. Манифестацијата има натпреварувачки карактер. Децата победници ќе ја посетат земјата чија што Амбасада ја претставувале на натпреварот. Децата од општина Василево ќе се натпреваруваат со децата од општините: Охрид, Јегуновце, Битола, Куманово, Прилеп, Штип, Кочани, Гостивар, Дојран,  Кичево, Велес, Кавадарци, Свети Николче, Дебарца, Радовиш, Новаци, Крива Паланка, Делчево и градот Скопје. Децата учесници во манифестацијата ќе бидат избрани по пат на аудиција. Манифестацијата ќе се пренесува на Македонската радио телевизија.

Организацијата на манифестацијата Македонија во ритамот на Европа, годинава  ја поддржуваат Министерството за локална самоуправа заедно со Секретаријатот за европски прашања.

Денес, Советот на општина Василево ја одржа редовната 47-ма седница  на која беа усвоени сите предлози од дневниот ред. Исклучок беше Предлог-одлуката за давање согласност за легализација на бесправно изградени објекти на земјиште на општина Василево  к.п бр. 1858/1 во КО Ангелци, која  на предлог од претседателот на Советот, г-дин Драги Митев, беше изземена од дневниот ред. Во образложението за предлогот за  изземање на точката од дневен ред, претседателот на Советот нагласи дека тоа е по сугестија на општинската администрација.

Едногласно, советниците ги донесоа Пограмата за управување со отпад на територијата на општина Василево за 2017 година,  Програмата за активностите на општина Василево во областа на заштитата и спасувањето, противпожарната заштита и справување со кризи во 2017 година и Програмата за работа на Советот на општина Василево за 2017 година. Едногласно беше донесена и одлука за утврдување на потребата од донесување на урбанистичко-планска документација за проширување на планскиот опфат и вклопување на бесправниот објект, викендица на к.п бр. 931/3 во КО Василево, како и две барања за финансиска поддршка. Советниците одлучија со по 20 000 денари да им се помогне на едно физичко лице за лекување и на ЛД „Фазан“ од Василево.

Во вторник, 29.11.2016 година, со почеток во 13,00 часот, Советот на општина Василево ќе ја одржи 47-та седница. За работа на седницата предчлошен е следниот дневен ред:

1. Предлог-програма за управување со отпад на територијата на општина Василево за 2017 год.

2. Предлог-програма за активностите на општина Василево во областа на заштитата и спасувањето, противпожарната заштита и справување со кризи во 2017 година.

3. Предлог-програма за работа на Советот на општина Василево за 2017 година.

4. Предлог-одлука за утврдување на потребата од донесување на урбанистичко-планска документација за проширување на планскиот опфат и вклопување на бесправниот објект, викендица на к.п бр. 931/3 во КО Василево.

5. Предлог-одлука за давање согласност за легализација на бесправно изградени објекти на земјиште на општина Василево к.п бр. 1858/1 во КО Ангелци.

6. Донесување на одлука по барањето поднесено од ЛД „фазан“ од Василево.

7. Донесување на одлука по барањето поднесено од Цеков Туше од с. Седларци.

Седницата ќе се одржи вопросториите на Домот на културата во Василево.