Викендов општина Василево асфалтираше во населеното место Висока Маала. На три различни локации асфалтирани се три улици  со кои се подобрува  локалната патна инфраструктура во ова населено место и им се олеснува пристапот на граѓаните кон своите домови. Конкретно станува збор за три мали улици од по 40-тина метри и ширина од по 3,5 до 4,0 метри според условите на теренот.   Изградбата на овие улици е планирана со Програмата на општина Василево за  изградба, реконструкција и одржување на локални патишта и улици и всушност претставува продолжување на активност која е започната претходната година.  Јавната набавка и Договорот за изведба со градежната компанија беа комплетирани кон  крајот на  2018–та, но активностите на терен беа одложени поради неповолните услови за градба во зимскиот период.

Буџетот за овие активности изнесува околу 940 000 денари и истиот е обезбеден од сопствени извори.

Изведувач на градежните работи е фирмата Бони Интерградба од Штип, избрана на јавниот повик како најповолен понудувач.

Градежните активности во општина Василево продолжуваат и во наредниот период и како што информира градоначалникот Марјан Јанев истите се одвиваат согласно плановите и Програмите на општината донесени од Советот на општина Василево.

Општина Василево, деновиве го санираше  локалниот пат Старо Владевци – Ново Владевци кој беше во особено лоша состојба.  Санацијата е извршена по целата негова должина односно санирана е должина од околу 1,6 км.  По гребењето и подготовката на теренот поставен е новиот асфалт со што  целосно се подобрени условите за одвивање на сообраќајот во овој дел од населеното место.

Според информацијата од градоначалникот на општина Василево Марјан Јанев,  во конкретниот случај санацијата е резултат на барањето на граѓаните на с. Владевци, произлезена од  средбите со граѓаните кои градоначалникот редовно ги одржува,  а на кои се идентификуваат проблемите и потребите на граѓаните.

Средствата за санација на овој локален пат се обезбедени од Буџетот на општина Василево а работите на терен ги изведува  фирмата  Изолација од Скопје, со која општина Василево има склучен договор врз основа на јавна набавка.

Патната инфраструктура и понатаму останува еден од главните приоритети на општина Василево чии активности ќе се реализираат и во наредниот период.

Следни на ред за санација се локалните патишта кон  населените места Добрашинци и Нова Маала, чија санација ќе започе деновиве.

Советот на општина Василево на денешната 20-та седница ги усвои завршните сметки за 2018 година на Буџетот на општина Василево, на основните општински училишта „Гоце Делчев“, Василево и „Атанас Нивичански“, Нова Маала, на  детската градинка  „Прва радост“ и јавното претпријатие за комунални дејности „Турија“ од Василево.

Согласност добија и Одлуката на УО на ЈПКД „Турија“ Василево за распоредување на добивката остварена по годишната сметка и финансискиот извештај за 2018 година  како и Годишниот план за вработување за 2019 година на ова претпријатие.

Советниците ги прифатија и предложените измени во составот на Комисијат за еднакви можности иКомисијата за земјоделие и заштита на животната средина, во кои дојде до промена на местата на советниците Христина Гошева и Илми Мустафов. Од Комисијата за еднакви можности разрешен е Илми Мустафов а на негово место именувана е Христина Гошева, додека во Комисијата за земјоделие и заштита на животните и растенијата на местото на разрешената Христина Гошева именуван е Илми Мустафов.

Советниците ги утврдија и местата на кои организаторите на изборната кампања на престојните претседателски избори ќе можат да истакнуваат изборни плакати.

Од предложениот дневен ред изземено беше Барањето за добивање на финансиски и материјални средства поднесено од МПЦ – Охридска Архиепископија,  Струмичка епархија – Парохија Василевска, со образложение дека поради престојните избори општината законски не е во можност да одобрува финансиски средства.

Во петок, 29.03.2019 година со почеток во 12,00 часот Советот на општина Василево ќе ја одржи редовната дваесетта седница.

За работа на Седницата предожен е следниот дневен ред:

1. Завршна сметка на Буџетот на општина Василево за 2018 година.
2. Годишен извештај на општина Василево за 2018 година.
3. Завршна семетка на ЈОУДГ „Прва радост“, Василево за 2018 година.
4. Давање согласност на Извештајот за работата и годишната сметка на ЈПКД „Турија“, Василево за 2018 година.
5. Давање согласност на Одлуката на Управниот одбор на јавното претпријатие за комунални дејности „Турија“, Василево за распоредување на добивката остварена по годишната сметка и финансискиот извештај за 2018 година.
6. Давање согласност на Годишниот план за вработување на ЈПКД „Турија“, Василево за 2019 година.
7. Завршна сметка на ООУ„Атанас Нивичански“, Нова Маала.
8. Предлог-решение за разрешување и именување на член на Комисијата за еднакви можности .
9. Предлог-решение за разрешување и именување на член на Комисијата за земјоделие и заштита на животните и растенијата.
10. Донесување на Одлука по Барањето за добивање на финансиски и материјални средства поднесено од МПЦ – Охридска Архиепископија, Струмичка епархија – Парохија Василевска.
11. Предлог-одлука за утврдување на места на кои е дозволено да се истакнат изборни плакати за изборите во 2019 година со обезбедени еднакви услови на сите организатори на изборната кампања во општина Василево.

Седницата ќе се одржи во просториите на Домот на културата во Василево.

Општина Василево е најтранспарентна во нејзиното работење  во рамки на Југоисточниот плански регион и општина која освен тоа што ги исполнува законските обврски за транспарентност користи и свои методи за да биде поблиску до граѓаните – покажаа резултатите од анализата за транспарентност при вработување на општините од Југоисточниот регион, направени од страна на Здружението на граѓани ПРОФИЦИО..

На презентацијата на резултатите од анализата со која се опфатени сите 10 општини од Југоисточниот плански регион  (Богданци, Босилово, Валандово, Василево, Гевгелија, Дојран, Конче, Ново Село, Радовиш и Струмица), претставникот од општина Василево, Верче Миткова пред присутните ги образложи  начините, практиките, каналите и методите кои се практикуваат во  во општина Василево, а чија крајна цел е транспарентност во работењето. Миткова потенцираше дека освен  информирањето на граѓаните во делот на она што значи законска обврска, општина Вaсилево континуирано подготвува и пласира информации кои се однесуваат на работењето на општината, на нејзините  органи, независно дали тоа е во делот на надлежностите на градоначалникот, советот , општинската администрација или јавните претпријатија и установи основани од општината.  За  разлика од сите останати општини во регионот општина Василево на својата официјална веб страна  www.opstinavasilevo.gov.mk , меѓудругото ги има објавено и огласите за унапредување на административни службеници што е само еден позитивен пример за транспарентно и отчетно работење на јавна институција.

Како резултат на анализата од ПРОФИЦИО општините добија и соодветни препораки во насока на зголемување на транспарентноста како на пример преземање иницијатива јавно да ги објават актите за систематизација и нивните измени. да се подобрат јавно достапните информации и отчетноста на општините при спроведување на постапките за вработување, да воспостават систем на континуирана обука и професионален развој со цел зголемување на квалитетот на јавните услуги.

Оваа анализа Здружението на граѓани ПРОФИЦИО ја има спроведено во рамки на проектот Транспарентна и ефикасна локална власт – услов за развој, имплементиран од „Фондација Отворено општество – Македонија (ФООМ)“ и „Евротинк – Центар за европски стратегии“, а финансиски поддржан од Европската унија во рамки на IPA Civil Society Facility and Media Programme 2015

Градоначалникот на општина Василево  Марјан Јанев, денес  ќе оствари средба со жителите на населеното место Василево. Средбата  ќе се одржи во просториите  на ООУ„Гоце Делчев“, Василево со почеток во 18,30 часот.  Ова е една од низата средби со граѓаните, кои деновиве градоначалникот ги реализира во населените места и на кои главно се разговара за актуелните потреби и проблеми и можните решенија за нивно надминување.  Според информацијата од градоначалникот Јанев, средбите  кои започнаа минатата недела ќе продолжат и во текот на наредните денови  односно  ќе се одржат во сите населени места. Целта е да се детектираат актуелните потреби и проблеми и во заеднички разговор и консултации  со сите засегнати страни   да се понудат решенија и да се изнајдат најсоодветните начини за брзо и ефикасно надминување на состојбите и решавање на проблемите.

Заради посеопфатен пристап кон актуелните состојби,  на  средбите со граѓаните освен градоначалникот присуствуваат и претставници од  локалната самоуправа и другите  релевантни државни и локални институции кои можат да дадат активен придонес  во решавање на идентификуваните проблеми и подобрување на  тековните состојби.

Досега, одржани се средби со граѓаните на населените места Едрениково, Пиперево, Градошорци (во Чифлик Маало), Сушево и  Висока Маала.  Вечерва ќе се одржи средбата со граѓаните на Василево а за утревечер закажана е средба со жителите на Нова Маала.

Вакви средби, во наредниот период ќе се одржат и во останатите населени места на општина Василево.

Општините Василево, Босилово и Ново Село добија универзален  ровокопач (скип) преку Проектот  за подобрување на општинските услуги  од Програмата  за развој на рураланата ифраструктура –  за која на барање на Владата,   Европската Унија се согласи да обезбеди 15,5 милиони евра.

Вкупниот износ на Програмата вклучително со износот за кофинансирање од страна на Владата на РСМакедонија изнесува 20,667 милиони евра.

Програмата ја имплементира Министерството за финансии на РСМакедонија а ја администрира Светска банка.

Според информацијата  добиена  од МСИП  Проектот, во рамки на Програмата,  од страна на Министерството за финасии направена е набавка на 10 возила –универзални ровокопачи (скипови), кои во наредниот период ќе им бидат предадени на општините. Една од тие општини е и општина Василево која ровокопачот го доби и ќе го користи во партнерство со општините Босилово и Ново Село.

Новата машина ќе помогне во одржување на патиштата, чистење на каналите, копање на ровови и за други работи за кои е наменета.

На веб страната на УНДП (Програмата за развој на обединетите нации) објавен е тендер за Изградба на прочистителна станица во с. Едрениково, општина Василево.

Заинтересираните понудувачи комплетната тендерска документација со сите информации и податоци околу постапката може да ја најдат на следниот линк:

http://procurement-notices.undp.org/view_notice.cfm?notice_id=53725

Крајниот рок за доставување на понудите е 21-ви март, 2019 година до 10,00 часот.

Заинтересираните понудувачи се покануваат на предпонудувачка конференција која ќе се одржи на 11-ти март 2019 година во 10,00 часот во просториите на УНДП во Скопје.

Прочистителната станица во с. Едрениково ќе се гради во рамки на проектот „Управување со сливот на реката Струмица“ преку кој во истото населено место во тек е изградба на систем за фекална канализација.

Советот на општина Василево, денес ја одржа редовната 19-та седница, од чиј дневен ред, на предлог на советничката Христина Гошева од Советничката група на СДСМ, беа изземени девет точки од дневниот ред. Сите девет точки беа барања за финансиска помош и спонзорства поднесени од правни и физички лица. Во образложението за ваквиот предлог Гошева нагласи дека поради веќе распишаните претседателски избори Советот нема законска можност да одобрува финансиски средства, по што предлогот за изземање на посочените точки од дневниот ред беше едногласно прифатен.

Како дополнителна точка за работа на седницате беше предложена и прафатена  Предлог-програма за спроведување на општите мерки за заштита на населението од заразни болести во 2019 година. Истата беше едногласно усвоена.

Со гласовите на сите присутни светници донесени беа и Планот за контрола на популацијата на бездомни кучиња на територијата на општина Василево (2019-2021),  Спогодбата за измена  и дополнување на Спогодбата за начинот и условите за заедничко организирање на извршувањето на линискиот превоз на патници за општините: Струмица, Босилово, Василево и Ново Село и  Одлуката за давање на времено користење без надоместок на недвижни ствари – простор на Министерството за труд и социјална политика – Скопје, Меѓуопштински центар за социјални работи Струмица согласно која на барање на Министерството за труд и социјална политика, општина Василево на  Меѓуопштински центар за социјални работи Струмица му отстапува простории за отварање канцеларија во која граѓаните ќе добиваат услуги од областа на социјалната сфера. Просториите се лоцирани во Василево, во зградата во која е и амбулантата и истите, со договор ќе му бидат отстапени на МТСП на одредено време.

На седницата беше усвоен и полугодишниот извештај за работата на ООУ„Атанас Нивичански“, Нова Маала за учебната 2018/2019 година, и Предлогот за разрешување на член на училишниот одбор на ова училиште и назначување на друг член. Разрешена беше Ели Ѓорѓиева а на најзино место назначена Виолета Тонева.

Советниците ја усвоија и предложената Одлука за утврдување на потребата од донесување на урбанистичко-планска документација за проширување на планскиот опфат и вклопување на бесправниот објект на К.П бр. 1765 во КО Василево вон г.р  и предложената Одлука за сопствено учество на општина Василево за реализација на проектот за улица во с. Нова Маала до резервоар согласно која општина Василево обезбедува сопствени средства во висина од  околу 980 000 денари за изградба на улица во Нова Маала за која средства во висина од 1 000 000 денари се обезбедени преку Министерството за финансии  од Проектот за подобрување на општинските услуги.