Утрово, гости во кабинетот на градоначалникот на општина Василево, Славе Андонов,  беа учениците од четврто одделение  од училиштето „Гоце Делчев“, Василево. Заедно со нивните наставнички, Сузана Илиева и Елисавета Пелтечка,  одржаа практичен час по предметите општество и историја.

„Задоволство е да се биде домаќин на такви гости“ рече градоначалникот Андонов, посакувајќи им добро утро и убав ден на учениците, кои не го криеја задоволството од посетата  и можноста за се што ги интересира лично  да го прашаат градоначалникт.  Својата љубопитност ја преточија во прашања од типот:  дали треба многу да се учи за да се биде градоначалник, кој предмет му бил омилен на градоначалникот, што планира да направи за  образованието, за училиштата, за школските дворови и игралишта…, на кои со задоволство одговараше градоначалникот.

Посетата ја завршија подарувајќи му на градоначалникот ликовни изработки со општинските обележја-  грбот и знамето на општина Василево.

„Ваквите посети треба да се почести, едни од други многу можеме да научиме. Учениците кај мене се секогаш добредојдени“,  им порача градоначалникот на учениците и нивните наставнички.