Синоќа, со почеток во 20,00 часот во просториите на Домот на културата во Василево, Советот на општина Василево ја одржа редовната 50-та седница. Дневниот ред беше дополнет со четири предлози, меѓу кои и  Предлог-одлука за измена и дополнување на Одлуката за настаната штета од природна непогода во општина Василево, а се однесува на штетите предизвикани од мразот во деновите 18, 19 и 20 март 2025 година.
Предлогот го образложи градоначалникот на општина Василево, Славе Андонов, кој рече дека е постигната согласност со Министерството за земјоделство, шумарство и водостопанство со цел да им се излезе во пресрет на земјоделците, посебно овоштарите кои имаат претрпено штета од мразот во наведениот период. Рокот за пријавување ќе биде продолжен а на терен проценки ќе вршат Комисиите кои се веќе формирани и вршат проценка на штетите предизвикани од градот. Предлогот беше едногласно усвоен од сите присутни советници.
Едногласно беа усвоени и останатаите  точки од дневниот ред, кој освен дополнувањето со Предлог-одлуката за штетата беше дополнет со уште три точки, главно барања за финанси средства и помош.
Дополнување и измена претрпе и Програмата за изградба на системи за одведување и пречистување на отпадни води во општина Василево за 2025 година. Измената се состои во зголемување на првично планираниот Буџет поради проширување на  активностите во делот на изградба на системите за фекална канализација низ населените места на општината.
Едногласно беа усвоени и промените на Програмата за уредување на просторот на градежно земјиште во руралните подрачја во општина Василево за 2025 година, која како што образложи градоначалникот Славе Андонов, проширена е со изградба на бетонскиот канал од с. Владевци до с. Сушево за кој пред два дена Градоначалникот потпиша договор со Министерството за локална самоуправа.
Усвоена беше и Предлог-програма за измена и дополнување на Програмата за изработка на урбанистички планови во општина Василево за 2025 година, како и двете точки кои се однесуваат на работењето на детската градинка во Василево и ООУ„Гоце Делчев“, Василево, односно Завршната сметка на ЈОУДГ „Прва радост“, Василево за 2024 година и Годишниот  план за вработување на ООУ „Гоце Делчев“, Василево за 2025 година.

Општина Василево обезбеди средства за изградба на бетонски канал на потегот од населено место Владиевци до  населеното место Сушево. Градоначалникот на општина Василево, Славе Андонов, вчера во просториите на Министерството за локална самоуправа го потпиша Договорот за изградба на бетонскиот канал со кој дел од средствата за реазлизација на овој проект се обезбедени преку ова Министерство во рамки на објавениот Јавен повик.
Планираниот Буџет, согласно првичните пресметки изнесува околу 7 000 000 денари, а вкупната должина е 1.2 км.
„Во просториите на Министерството за локална самоуправа го потпишав договорот за изградба на бетонски канал од Владиевци до Сушево, во рамките на Јавниот повик кој го објави Министерството за локална самоуправа“, напиша во објавата на својот ФБ профил, https://www.facebook.com/vasilevo24, градоначалникот Андонов по потпишувањето на договорот.
Градоначалникот ги најави и проектите со чија реализација во овие две населени места ќе се подобрат условите за живот на граѓините и воедно ќе се одговори на нивните барања.
„ Во Владиевци ќе се реализираат неколку капитални проекти: Бетонски канал од Владиевци до Сушево, со што овој дел од населеното место ќе добие нов лик, но во исто време ќе реконструира и постоечката фекална канализација,  ќе се реконструира кошаркарското игралиште и истото ќе добие современ лик, партерно ќе се уреди дворот околу новата црква во Владиевци; ќе се асфалтира улицата до Павлов Драги, ќе се бетонира улицата до Ристо Ѓоргиев, ќе се асфалтира улицата покрај поштата, почнувајќи од кошаркарското игралиште, која е долгогодишно барање на граѓаните од Владиевци“, информира Градоначалникот. Граѓаните заслужуваат модерна и инфраструктурно развиена општина Василево. Изминатите 3 години на дело покажавме како се работи и како се реализираат дела“,стои во објавата на Градоначалникот кој преку низата планирани проекти за наредниот период го најавува развојот на општината.
Андонов сподели информација и за планираните проекти во другите населени места од општината. „Нови проекти ќе се реализираат во сите населени места: Изградба на отворен канал во  Дукатино; Изградба на фекална канализација во Радичево; Реконструкција и ревитализација на улица од влез до центар на Пиперево; Реконструкција на улица во Нова Маала кон гробишта; Изградба на последен крак од фекална канализација во Пиперево; Изградба на улица кон болницата во Пиперево;  Уредување на атмосферски канал во турското маало во Градошорци; Уредување со бекатон на патеки во селските гробишта во Ангелци; Асфалтирање на улици во: Ангелци, Дукатино, Радичево, Сушево, Василево, Градошорци, Седларци, Пиперево, Едрениково, Чанаклија, Висока Маала, Доброшинци, Владиевци и Нова Маала“, се проектите кои во наредниот период ќе бидат реализирани низ сите населени места на општина Василево.

На 21.05.2025 година (среда), Советот на општина Василево ќе ја одржи редовната 50-та седница. За работа на седницата предложен е следниот дневен ред:

1. Предлог-програма за измена и дополнување на Програмата за изградба на системи за одведување и пречистување на отпадни води во општина Василево за 2025 година;
2. Предлог-програма за измена и дополнување на Програмата за уредување на просторот на градено земјиште во руралните подрачја во општина Василево за 2025 година;
3. Предлог-програма за измена и дополнување на Програмата за изработка на урбанистички планови во општина Василево за 2025 година;
4. Завршна сметка на ЈОУДГ „Прва радост“, Василево за 2024 година;
5. Годишен план за вработување на ООУ „Гоце Делчев“, Василево за 2025 година
6. Донесување на Одлука по Барање за финансиски средства поднесено од Светланка Ѓорѓиева од Струмица;
7. Донесување на Одлука по Барање за финансиски средства поднесено од Стојан Ристов од Едрениково;
8. Донесување на Одлука по Барање за финансиски средства поднесено од Шефкат Јакупова од Пиперево;
9. Донесување на Одлука по Барање за финансиски средства поднесено од Неџатин Алиев од Василево;
10. Донесување на Одлука по Барање за финансиски средства поднесено од Игор Ѓоргиев од Пиперево;
11. Донесување на Одлука по Барање за финансиски средства поднесено од Јордан Глигоров од Градашорци.

Педесета седница, 21.05.2025

Синоќа, 12.05.2025 година, со почеток во 20,00 часот, Советот на општина Василево одржа вонредна седница, со единствена точка на дневен ред: Предлог – Одлука за измена и дополнување на Одлуката за формирање Комисии за процена на штета од природни непогоди. Седницата, како што образложи градоначалникот на општина Василево Славе Андонов, оваа вонредна седница е заради комплетирање на Комисиите за процена на штетите од природната непогода која ја зафати територијата на општина Василево на 07.05.2025 година. Комплетирањето на комисиите се однесува на членовите односно стручните лица  предложени од страна на  Министерството.
По направените измени Комисиите се во следниот состав:

1.Саветка Петрова Атанасова – претседател на Комисијата (вработена во МЗШВ ПЕ Струмица);
2.Ристо Велков – член на Комисијата (дипломиран агроном, инженер и градинарство);
3.Божин Николов – член на Комисијата (вработен во МЗШВ ПЕ Струмица);
4.Катерина Јованова – член на Комисијата (дипломиран економист, вработена во општина Василево);

1.Миле Петров – претседател на Комисијата (дипломиран земјоделски инженер);
2.Блажо Крстев – член на Комисијата (вработен во МЗШВ ПЕ Струмица);
3.Боби Величковски – член на Комисијата (дипломиран менаџер по менаџмент на човечки ресурси, вработен во општина Василево)

1.Ванчо Атанасов – претседател на Комисијата (вработен во МЗШВ ПЕ Струмица);
2.Соња Иванова – член на Комисијата (дипломиран економист, вработена во општина Василево);
3.Симона Стојанова – член на Комисијата (дипломиран економист, вработена во општина Василево)

Седницата може да се проследи на you tube каналот на општина Василево, https://www.youtube.com/@%D0%9E%D0%BF%D1%88%D1%82%D0%B8%D0%BD%D0%B0%D0%92%D0%B0%D1%81%D0%B8%D0%BB%D0%B5%D0%B2%D0%BE-%D0%BA3
на следниот линк https://www.youtube.com/watch?v=Z4snFjyv4Dk.

Градоначалникот на општина Василево Саве Андонов, преку својот ФБ профил, https://www.facebook.com/vasilevo24, најави излегување на Комисиите за процена на штета на терен во скоро време, заради како што вели да им се овозможи на земјоделците да ги обноват земјоделските површини.
„Излегуваме во пресрет на земјоделците, побргу ќе ја направиме проценката, за да се обноват површините кои што се зафатени од невремето во општина Василево“, стои во објавата на градоначалникот, каде изразува и благодарност до министерот Цветан Трипуновски  кој ја посети општина Василево и Министерството за земјоделство шумарство и водостопанство затоа што овозможи стручни луѓе од подрачната единица на ова Министерство да бидат вклучени во општинските Комисии за процена на штетата.
„Во посета на општина Василево беше министерот за земјоделство, шумарство и водостопанство Цветан Трипуновски. Веќе се формирани Комисии за процена на штета. Да се заблагодарам на министерството што ни овозможи со стручни луѓе од Подрачната единица да учествуваат во овие Комисии се со цел проценката да се изработи стручно.
Јавниот повик за пријавување на штета веќе тече, првичните барања веќе се пристигнати.
Комисиите ќе излезат на терен нема да го чекаат крајниот рок до 20-ти мај кога треба да заврши повикот за пријавување на штети, се со цел да направиме благовремена процена на штетата која што е причинета, затоа што се работи за раноградинарски производи“, информира градоначалникот Андонов.
Барањата се поднесуваат во просториите на општината и кон истите задолжително се приложува копија од важечки имотен лист, договор за закуп доколку површината е под закуп, лична карта и трансакциска сметка.

Општина Василево оваа година се приклучи на најголемата еколошка акција во Република Македонија “Генералка викенд 2025”. Вработените во локалната самоуправа, заедно со вработените во училиштата и учениците ги чистеа јавните површини низ населените места на општината. Во акцијата се вклучи и градоначалникот на општина Василево Славе Андонов, кој задовослтвото од вклученоста во акцијата и постигнатите резултати го сподели преку својот ФБ профил, https://www.facebook.com/vasilevo24.
„Вршевме чистење на повеќе јавни површини во неколку населени места во општината.
Им благодарам на вработените во општината, учениците и наставниците од двете општински училишта и градинката, кои земаа активно учество во реализацијата на акцијата.
Остануваме партнер на сите општествено одговорни организации“, стои во ФБ објавата на градоначалникот Андонов.

Вчера, Министерот за земјоделство, шумарство и водостопанство ја посети општина Василево за и лично да направи увид во состојбата по невремето што ја зафати општината на 07 мај.  „По последното невреме кое се случи овде, во комуникација сме со градоначалникот и локалната администрација.  Денеска сум овде за да извршам увид и лично да ја процениме состојбата од невремето кое што го зафати овој дел од општината“, истакна министерот во Василево.
„Градоначалникот ме информираше дека веќе се формирани Комисии за процена на штета. Mорам да кажам дека Mинистерството со стручни луѓе од Подрачната единица учествува во овие Комисии со цел проценката да се изработи стручно, изјави Министерот кој дополнително појасни дека Јавниот повик објавен од страна на општина Василево е во тек и истиот трае до 20 мај, но Комисиите ќе излезат на терен за да може благовремено да се направи процена и да им се овозможи на земјоделците површините да ги обноват.
„Деновиве, Комисиите ќе излезат на терен нема да го чекаат крајниот рок до 20 мај кога треба да заврши повикот за пријавување на штети, се  со цел да направиме благовремена процена на штетата која што е причинета, затоа што се работи за раноградинарски култури. Треба да излеземе во пресрет на земјоделците, побргу да ја направиме проценката за да се обноват површините кои што се зафатени“, посочи министерот.
По завршувањето на целата проценка, Комисијата ќе изготви елаборат за настаната штета и истиот ќе биде  доставен до Владата која ќе одлучи за висината на процентот на обештетување.
Во општина  Василево во тек е пријавување на штетата и истото согласно објавениот Јавен повик ќе трае до 20.05.2025 до 16,00 часот.

Советот на општина Василево на синоќа одржаната вонредна седница, донесе Одлука дека на ден 07.05.2025 година имаше настанатато природна непогода (пороен дожд и град) во населените места во Општина Василево (Доброшинци, Нова Маала, Висока Маала, Ангелци, Градошорци, Седларци, Едрениково, Дукатино, Радичево, Требичино, Сушево, Владиевци, Василево, Пиперево и Чанаклија.), каде што има сторено штета врз земјоделските култури. Со Одлука на Совет формирани се и две Комисии за процена на штета од природни непогоди кои ќе направат увид и утврдување на  штетата по секое поднесено барање од граѓаните.
Граѓаните кои претрпеле штета, Барање за проценка на штета можат да поднесат во просториите на општина  Василево, од  денес, 09.05.2025 до 20.05.2025 година, од 08,00 до 16,00 часот. Во прилог на Барањето треба да се достави  имотен лист или договор за закуп,  лична карта и трансакциска сметка од барателот.