Градоначалникот на општина Василево денес беше домаќин на како што рече „иднината на општина Василево“, учениците од ООУ „Гоце Делчев“ пред кои се претстави и им ги претстави надлежностите и улогата на локалната самоуправа односно Советот и Градоначалникот – двата органи задолжени за функционирање на општината.

Учениците од осмо одделение, заедно со својот предметен наставник Наце Тушев, во рамки на предметот „граѓанско образование“, беа во посета на градоначалникот и општината, каде во непосредна комуникација со градоначалникот и вработените  учеа за надлежностите на општината и  градоначалникот, за начинот на кој општината функционира, која е нејзината улога во  подобрувањето  на условите за живот во населените места и нејзиното  значење во креирањето и стварањето на се она што значи услови за живеење во заедницата.

Преку прашања до градоначалникот учениците расчистија дел од своите дилеми околу неговите надлежности и улогата што ја има во одредени сфери, како образование, спорт, инфраструктура, кои беа предмет на нивниот интерес.

За да добијат појасна слика за функционирањето и надлежностите на локалната самоуправа, учениците ги посетија и одделенијата во општината, каде стручните служби на едноставен начин им ја доближија работата,  улогата и значењето на локалната самоуправа во нивното и во секојдневието на нивните родители.

Со пораката дека ова е отворена општина која ги поддржува своите ученици, градоначалникот Андонов ги испрати учениците.

„Вие сте сите наши деца, деца кои еден ден ќе не замените нас и  ќе продолжите да ја развивате и градите општина Василево. Таа е ваша општина. Затоа бидете амбициозни и вредни , вложувајте во себе,  а ние сме секогаш овде за да ве поддржиме“, им порача градоначалникот Андонов  на осмооделенците од ООУ „Гоце Делчев“, кои денес  беа негови гости.