„ Еден по еден, чекор по чекор, ги исполнуваме ветувањата и ја менуваме сликата на целата општина. Градошорци добива ново лице, а задоволството на жителите е нашата најголема награда. И денес нови проекти. Денес во Градошорци се асфалтираа уште три нови улици. Со тоа, три маала добија подобри услови за живот, полесен пристап до домовите и достоинствен изглед каков што заслужуваат нашите жители“, стои во најновата ФБ објава на градоначалникот на општина Василево Славе Андонов, https://www.facebook.com/vasilevo24,   со која информира за последните активности во делот на изградбата на локалната патна инфраструктура. Имено со асфалтирањето на овие три улици и двете од претходните денови во Турското маало, во Градашорци комплетно е завршено асфалтирањето на локални улици планирани со Програмата за изградба, реконструкција, одржување на локални патишта и улици за 2025 година.
Според техничката документација и договорот со градежната компанија-изведувач на работите на терен, станува збор за вкупно пет улици со должина од 150, 135, 130, 120  и 71, метри односно 606 метри или новоасфалтирана површина од 1987 м² на пет различни локации.  . Вкупниот Буџет за комплетна реализација на активностите изнесува 3 115 855 денари, средства планирани и обезбедени со Буџетот на општина Василево за 2025 година.
Градоначалникот Андонов го најави и  како што рече, најголемиот проект за Градашорци – изградба на фекална канализација: „Продолжуваме и понатаму со силно темпо, затоа што Василево и сите населени места заслужуваат современа и уредена инфраструктура! Најголемиот проект за Градошорци – изградба на фекална канализација ќе се реализира во наредниот период“.

„Горд сум што во мојот мандат се асфалтира улицата во Пиперево што води до болницата и училиштето“, стои во ФБ објавата на градоначалникот на општина  Василево, Славе Андонов, https://www.facebook.com/vasilevo24, со која ја споделува информацијата за последните градежни активности реализирани од страна на општина Василево во населеното место Пиперево, каде што е направена  целосна реконструкција на улицата што  води од гробиштата кон амбулантата. Податоците од техничката документација се дека  должината на оваа улица изнесува 420 метри, ширината е околу 4,5 метри односно  1930 м² нов асфалтен слој. Според Договорот со изведувачот,  планираните средства  за реализација  се  5 009 396 денари од кои 3 423 278 се обезбедени од Министерството за локална самоуправа – Биро за регионален развој преку Програмата за рамномерен регионален развој  за 2025 година и 1 586 118 денари обезбедени од сопствените извори на приходи на општината, како сопствено учество во вкупната инвестиција.
Проектот е реализиран во партнерство со Центарот за развој на ЈИПР, за што во средината на месец јули градоначалникот потпиша договор со директорот на ЦРЈИПР Ѓоко Камчев.
Андонов најави реализација и на други активности во населеното место Пиперево: „Во Пиперево следува голема градежна офанзива, изградба на последните краци од фекална канализација а во исто време ќе започнат и активностите за асфалтирање на главната улица. Го исполнив ветувањето од мојата програма. Граѓаните на Пиперево  ја очекуваа оваа улица, повеќе години.  Постојат политичари кои си стојат на зборот и го реализираат ветенот“, стои во ФБ објавата на Градоначалникот.

„Општина Василево – пример за транспарентност! Како градоначалник, горд сум што Василево е меѓу најдобрите во државата и што секој ден заедно пишуваме успешна приказна.  Според истражувањето на Индексот на активна транспарентност, Василево е:
2-ро место во Југоисточниот регион.  24-то место на ниво на државата. Со освоени 91,3%, нашата општина се најде пред многу поголеми општини во Македонија. Тоа е јасен доказ дека не е важна големината, туку посветеноста и чесната работа за граѓаните. Ветивме транспарентна општина и тоа ветување го исполнуваме. Продолжуваме со уште подобри резултати за Василево!“, стои во ФБ објавата на градаоначалникот на општин Василево,  Славе Андонов, https://www.facebook.com/vasilevo24, во врска со податоците објавени од страна на Центарот за граѓански комуникации, https://www.ccc.org.mk/,  а кои се однесуваат на годишното рангирање на институциите според индексот на активна транспарентност, https://www.ccc.org.mk/images/aktivna%20transparentnost%202025f.pdf.
Под „активна транспарентност“ се подразбира објавувањето информации на сопствена иницијатива на институциите, без притоа некој да има доставено до нив барање за пристап до тие информации. Наспроти тоа, во случаите кога до институцијата се доставува барање за одредена информација, станува збор за „реактивна транспарентност“.
Институцијата којашто објавува информации врз проактивна основа остварува корист по неколку основи: активната транспарентност ѝ помага на институцијата да биде поодговорна во трошењето на јавните пари; на тој начин институцијата ги промовира принципите на добро владеење и интегритет и институцијата е поефикасна бидејќи подобро управува со информациите со коишто располага.

„Во Пиперево се градат последните краци фекална канализација. Зборот што го дадов – денес е реалност. Со дела а не со празни зборови“, стои во ФБ објавата на градоначалникот на општина Василево Славе Андонов, https://www.facebook.com/vasilevo24, со која информира за последните градежни активности на фекалната канализација на с. Пиперево . „Денес сме сведоци на реализцаија на уште едно исполнето ветување. Во Пиперево се градат последните метри од фекална канализација која претходно ја ветивме. Ова е проект за кој одамна зборувавме. Нешто што беше потреба за секојдневниот живот на луѓето и конечно тоа станува реалност . Кога пред граѓаните го дадов зборот дека секое населено место ќе добие подобри услови за живеење многумина велеа дека тоа ќе биде тешко или невозможно. Но јас верував и уште поважно, работев со тимот, со соработниците и сограѓаните. Резултатот денес го гледаме овде во Пиперево. Оваа канализација значи почисто Пиперево, повеќе здравје за сите граѓани, за децата и подобра иднина за секое семејство. Тоа е вистинската победа. Кога делата зборуваат наместо празните ветувања. Ова не е крај. Напротив ова е мотив плус да продолжиме уште посилно. Ќе има нови проекти, нови успеси и уште повеќе реализирани ветувања. Јас сум човек што си стои на дадениот збор. Денес Пиперево го потврдува тоа. Ви благодарам за довербата и ви ветувам заедно продолжуваме понатаму, порачува градоначалникот Андонов, во своето видео обраќање,  https://www.facebook.com/reel/1885620338963728, при неговата посета на Пиперево и увидот во активностите на изградбата на канализациониот систем.
Конкретно во градба се Колектор К1 со приклучни краци во вкупна должина од 1438 метри и буџет од 6 922 801 денари обезбедени преку Вториот владин повик за средства од унгарскиот кредит и уште еден крак во должина од 156 метри и буџет од 1 166 102 денари обезбедени од сопствените извори на приходи на општината.
Со завршувањето на изградбата на овие краци, Пиперево ќе биде комплетно покриено со систем за фекална канализација а со тоа и сите домаќинства ќе имаат можност да се приклучат на канализациониот систем.
Цената за приклучување на домаќинствата кон системот за фекална канализација изнесува 20 000 денари

Општина Василево изврши бетонирање на пристапната патека во гробиштата во населеното место Ангелци. Оваа активност е планирана со Програмата за измена и дополнување на Програмата за уредување на просторот на градежно земјиште во руралните подрачја во општина Василево за 2025 година. Средствата за изградба на патеката, согласно Договорот со компанијата изведувач изнесуваат 229 934 денари и истите се планирани со Буџетот за 2025 година а обезбедени од сопствените извори на приходи. Вкупната површина на патеката според податоците од  техничката документација  изнесува 120 м² .
Вчера, увид во изведбата на работите на лице место направи градоначалникот на општина Василево, Славе Андонов, кој преку фотографии сподели дел од тековните активности.
„Бетонирана пристапна патека во селските гробишта во Ангелци. Оваа е долгогодишно барање, на граѓаните од населеното место Ангелци. Средствата за реализација на овој проект целосно се обезбедени од Буџетот на општина Василево“, стои во објавата на градоначалникот, https://www.facebook.com/vasilevo24, споделена преку социјалните медиуми.

„Добро утро драги мои од Радичево. Со убави вести го почнуваме денот – конечно целото населено место ќе добие фекална канализација. Потпишан е договорот со изведувачот Жикол од Струмица, а со тоа се отвори едно ново поглавје за подобар и поквалитетн живот во нашето Радичево. Почнуваме реализација на еден од најважните инфраструктурни проекти за Радичево. Како градоначалник си стојам на зборот – ветеното се исполнува“, напиша на својот ФБ профил, градоначалникот на општина Василево Славе Андонов, споделувајќи ја информацијата за потпишувањето на Договорот за изградба на систем за фекална канализација во населеното место Радичево.
Буџетот за овој  капитален проект изнесува  52 929 787 денари, обезбедени преку вториот повик на Владата за средства од унгарскиот кредит. Со системот за фекална канализација ќе биде опфатено целото населено место. Согласно техничката документација на терен ќе бидат изведени шест колектори и тоа: колектор К0 во должина од 524 метри и колектори К1, К2, К3, К4 и К5  со припадни канали во должина од 8235 метри или вкупно околу 9 км. колекторска мрежа со која секое домаќинство ќе добие можност за приклучување на системот за фекална канализација
Согласно Договорот со компанијата изведувач комплетната изградба треба да заврши до крајот на наредната 2026 година.

Синоќа, во Домот на културата во Василево, со почеток во 20,00 часот Советот на општина Василево ја одржа 55-та седница. Дневниот ред, на предлог на претседателот на Советот, Ристо Делијанов беше дополнет со уште еден предлог: Донесување Одлука за согласност за паралелки со помал број од законски утврдениот број во ООУ „Гоце Делчев“, Василево.
Заедничко за сите предлози од дневниот ред е што се усвоени едногласно, без дискусии и забелешки. Осум  од вкупно десетте точки се од областа на работата и функционирањето на воспитно образовниот процес. Годишната програма за работа на ЈОУДГ „Прва радост“, Василево за воспитната 2025/2026 година; Годишниот извештај за работата на ЈОУДГ „Прва радост“, Василево за воспитната 2024/2025 година; Годишниот план за вработување за 2026 година на ЈОУДГ „Прва радост“, Василево; Одлуката на Управниот одбор на ЈОУДГ „Прва радост“, Василево за прием на повеќе или помалку деца во група; Одлуката на Управниот одбор на ЈОУДГ „Прва радост“, Василево за утврдување на почетокот и завршетокот на работното време на ЈОПУДГ „Прва радост“, Василево; Одлуката на Управниот одбор на ЈОУДГ „Прва радост“, Василево за утврдување на комисија за прием на повеќе деца од проектираниот капацитет на ЈОУДГ „Прва радост“, Василево и Утврдување на поблиски критериуми за прием на деца, се точките кои беа усвоени а се во функција на непречено функционирање на работата на детската градинка.
Од областа на образованието усвоени беа Годишната програма за работа на ООУ „Атанас Нивичански“, Нова Маала за учебната 2025/2026 година и Одлука за согласност за паралелки со помал број од законски утврдениот број во ООУ „Гоце Делчев“, Василево.
Усвоен беше и Годишниот план за вработување за 2026 година на општина Василево.
Во пресрет на локалните избори, Соцветниците едногласно ги утврдија и местата на кои е дозволено да се истакнат изборни плакати, при тоа обезбедувајќи еднакви услови за сите организатори на изборната кампања во општина Василево.
Во населеното место Василево тоа се трафостаниците 2,3 и 4. Во Градашорци – трафостаицата 2; во Ангелци, трафостаница 2; во Едрениково, трафостаница 1; во Пиперево, трафостаница 1 и 2, во Владиевци- трафостаница 2; во Радичево, трафостаница 2; во Дукатино, трафостаница 2; во Добрашинци, трафостаница 1 и Домот на културата; во Нова Маала, Домот на културата и во населеното место Чанаклија, кај селската чешма. Исто така изборни плакати можат да се истакнат и на електричните столбови како и помеѓу два електрични столбови во населените места. Не е дозволено да се поставуваат плакати на електричните кабли од електричните столбови,  на мостовите во населените места во кои ги има, на културно-историски споменици и дрвја во населените места на општина Всилево.
Во Одлуката е регулирано и отстранувањето на изборните плакати и тоа во рок од 30 дена по завршувањето на изборите. Во спротивно тоа ќе го направи ЈПКД „Турија“, Василево на сметка на организаторот на кампањата.
Непочитувањето на одредбите од оваа Одлука е казниво според одредбите на Изборниот законик.

„Владиевци доби реконструирано кошаркарско игралиште. Поставена е модерна тартан подлога и со тоа ова игралиште е прво од ваков тип во нашата општина. Нова ограда,  нови кошеви. Многу генерации деца, спортисти и натпреварувачи од Владиевци ќе имаат спомени од детството на оваа игралиште . Владиевци доби ново квалитетно место за рекреирање. Го менуваме ликот на Општина Василево“, стои во ФБ објавата на градоначалникот на општина Василево,  Славе Андонов со која информираше за комплетното завршување на сите планирани активности на кошаркарското игралиште во с. Владиевци. Дел од финалните активности на терен може да се видат на видеото, https://www.facebook.com/vasilevo24/videos/1842317906689072, при увидот направен од страна на градоначалникот Андонов.
Реконструкцијата е целоса и истата е направена со поддршка и партнерство со Државната видео лотарија  на Македонија – Касинос Аустриа ДОО Скопје кои го имаат обезбедено вкупниот буџет кој изнесува околу 1 000 000 денари.
Одсега сите сегашни и идни спортисти чиј избор е кошарката, ќе спортуваат и ќе се натпреваруваат во овој современо уреден простор, ограден, осветлен и со специјална тартан подлога.
На ова игралиште години наназад, по повод верскиот празник  Успение на Пресвета Богородица се одржува и традиционалниот Street basket турнир на кој се натпреваруваат екипи од регионот.

Во населеното место Василево, во реновираниот Дом на културата,  беше отворена подрачна канцеларија на Управата за водење на матични книги, популарно познато како матично, кое беше затворено пред околу пет години.
По тој повод увид во новите простории направија директорот на Управата за водење на матични книги и грaдоначалникот на општина Василево, Славе Андонов.
„Со директорот на Управата за водење на матични книги, извршиме увид на просториите каде ќе биде сместено матичното односно во домот на културата во Василево.
После цели пет години, конечно ја отвораме, повторно канцеларијата на матично во Василево.
Знам колку мака и нервози на граѓаните им создаваше, тоа што за еден обичен документ мораа да патуват во други места. Од денес па натаму, матичното е тука – дома, кај што му е местото. Ова е чекор напред за сите нас, затоа што нашата администрација мора да биде блиску до народот, а не далеку од него. Аирлија нека е! Да им служи на граѓаните“, стои во ФБ објавата на градоначалникот Андонов, https://www.facebook.com/vasilevo24,  со која со граѓаните ја споделува веста за повторното отварање на канцеларијата на оваа служба.
Граѓаните од населените места на општина  Василево, како и од Добрејци и Просениково, сите документи кои спаѓаат во делокругот на работата на оваа служба, како изводи на родени, изводи на венчани, изводи на умрени ќе можат да ги вадат во оваа канцеларија, како и регистрација односно склучување на граѓански брак за сите оние кои ќе се одлучат тоа да го направат во својата матична општина.
Изјавата за медиумите на градоначалникот Андонов, може да се види на следниот линк: https://www.facebook.com/vasilevo24/videos/4128672167374096.