На 26.08.2020 год. (среда), со почеток во 12,00 часот,  Советот на општина Василево ќе ја одржи триесет и петата седница. За работа на Седницата предложен е следниот дневен ред:

1. Годишен извештај за работата на ООУ„Атанас Нивичански“, с. Нова Маала за учебната 2019/2020 година.
2. Годишна програма за работа за учебната 2020/2021 година на ООУ „Атанас Нивичански“, с. Нова Маала.
3. Годишна програма за работа за учебната 2020/2021 година на ООУ „Гоце Делчев“, с. Василево.
4. Финансиски извештај на ЈП „Турија“ за прво полугодие за 2020 година од 01.01.2020 до 30.06.2020 година.
5. Предлог-одлука за пренесување на правото на користење и управување со водоснабдителниот систем за с. Седларци на ЈПКД „Турија“, Василево.
6. Предлог-одлука за утврдување на потребата од донесување на урбанистичко-планска документација за промена на трасата на сообраќајната инфраструктура или сообраќајната инфраструктура воопшто нема да се предвиди и вклопување на бесправниот објект –деловен објект на к.п бр. 2350 во КО Василево.
7. Донесување на Одлука по Барањето за финасиски средства поднесено од Здружение на тутунопроизводители „Басмак“, Василево.
8. Донесување на Одлука по Барањето за финасиски средства поднесено од група на граѓани од с. Владевци.

Седницата ќе се одржи во просториите на Домот на културата во с. Василево.

Се известуваат граѓаните од општините Василево, Струмица и Радовиш и дека СЕ ОДЛОЖУВА третото прскање против возрасни комарци кое беше предвидено да се изврши на 19 Август 2020 година (среда).

Прскањето се одложува поради неповолни временски услови т.е појава на врнежи во предвидениот период, а за спроведување на планираното трето прскање против возрасни комарци, граѓаните од општините Василево, Струмица и Радовиш и  ќе бидат дополнително известени.

Се известуваат сите граѓани од Југоисточниот плански регион дека третото прскање против возрасни комарци ќе се изврши на 19 и 20 Август 2020 година, со следниот распоред:

1. На 19.08.2020 година (среда), во период од 19.00 до 02.00 часот во општините Конче, Радовиш, Струмица, Босилово, Василево и Ново Село;
2. На 20.08.2020 година (четврток), во период од 19.00 до 02.00 часот во општините Валандово, Богданци, Дојран и Гевгелија.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот период.

Во населеното место Владевци, асфалтирана е улица, која како што објави градоначалникот на општина Василево на официјалната ФБ страна на општина Василево, улицата е изградена во соработка со граѓаните кои живеат на оваа улица.

„Градиме по план, програма и приоритети и секогаш во соработка со граѓаните“, напиша градоначалникот на општина Василево Марјан Јанев кој упати голема благодарност до граѓаните  кои живеат на оваа улица, за како што рече нивната ангажираност да се реализира улицата.

На 12.08.2020 година (среда), ОО на Црвен крст Струмица во соработка со Службата за трансфузиона медицина и поддршка на општина Василево,  организира  акција на доброволно дарување на крв.

Акцијата ќе се одржи во просториите на ООУ „Гоце Делчев“, Василево во периодот од 09,00 до 14,00 часот.

Акцијата ќе се спроведува во согласност со протоколите  за Ковид-19 и е сосема  безбедна за сите учесници.

Упатуваме апел до сите граѓани на општина Василево, да бидат хумани, да се вклучат во акцијата и притоа да се придржуваат до препораките за заштита од Ковид-19.

Голем пожар избувна на депонијата Шапкар кај селото  Добрашинци  на која се депонира комуналниот отпад од општините Струмица и Василево.

Градоначалникот на општина Василево Јанев кој се наоѓа на  лице место, информира дека пожарот зафатил поголема површина, а силниот ветар го проширува кон површините на АД Струмичко Поле и населеното место Доброшинци.

Во гаснењето на пожарот учествуваат екипи на ЈПКД „Комуналец“ од Струмица и механизацијата на АД Струмичко Поле.

Упатуваме апел до граѓанитекои имаат потреба од движење во овој реон, да бидат крајно внимателни бидејќи поради густиот чад попречено е нормалното одвивање на сообраќајот.

Денес, Советот на општина Василево ја одржа 34-та редовна седница на која беа разгледани и донесени повеќе одлуки, решенија, извештаи, планови и други акти од делокругот на активностите и надлежностите на локалната самоуправа.

Советниците ги усвоија извештаите за работа на општина Василево за првиот и вториот квартал од годината односно Квартален извештај за извршување на Буџетот (К-1), Квартален извештај  за доспеаните а неизмирени обврски (К-2) и Квартален извештај за промените на состојбата на задолжувањето (К-3) за периодот од 01.01.2020 до 31.03.2020 и за периодот од 01.01.2020 до 30.06.2020. Според образложението дадено од административниот службеник од одделението за финансии во општина Василево,  Соња Иванова, на крајот од првиот  пресметковен период (01.01.2020 до 31.03.2020), реализацијата кај консолидираниот Буџет  (Буџетот кој ги вклучува и единките корисници односно основните општински училишта и детската градинка) реализацијата е 18%, а кај основниот Буџет на општината реализацијата е 15%. Реализацијата кај блок дотациите е 23%, кај самофинансирачките 13% , а кај донациите 44%. Во делот на кредити општината има обврска по основ на доспеана рата која изнесува 1 678 123 денари и каматата од 760 денари.

Што се однесува до вториот пресметковен период, 01.01.2020 до 30.06.2020, реализацијата кај консолидираниот  буџет е 36%, а кај основниот,  (Буџетот на општина Василево без Буџетите на единките корисници),  реализацијата е 27%. Кај блок дотациите реализацијата е 49%, кај самофинансирачките 22% , а кај донациите 94%. Во делот на кредити состојбата е иста како и во првиот пресметковен период, односно останува обврската за плаќање на една доспеана рата чиј износ е  1 678 123 денари и каматата од 760 денари.

На седницата беа усвоени и годишните планови за вработување за 2021 година на општина Василево, на ЈПКД „Турија“, Василево  и на ООУ „Атанас Нивичански“, Нова Маала. Дел од обемниот дневен ред на денешната седница беа и Годишниот извештај за работа на Центарот за развој на Југоисточниот плански регион, Завршната сметка за 2019 година на ООУ „Атанас Нивичански“ и Извештајот за работата и годишната сметка на ЈПКД „Турија“, Василево за 2019  година, кои го добија потребното мнозинство. Советниците ја прифатија и иницијативата за воспоставување меѓуопштинска соработка за решавање на проблемот со бездомните животни на ниво на регион.

Позитивно мислење добија и Предлог-одлуките за утврдување на потребата од донесување на урбанистичко планска документација за проширување на планскиот опфат и вклопување на бесправните објекти на К.П бр. 555 во КО Нова Маала.

Со одлука на Советот, ЈПКД „Турија Василево ги доби во сопственост возилото за собирање и транспорт на смет кое неодамна општина Василево го обезбеди и системот за фекална канализација и прочистителната станица во с. Едрениково. Како дополнување на денешниот дневен ред беа Предлог-одлуката за доставување на предлог-проект за изработка на техничка документација „Основен проект за изградба на затворен базент“ и Предлог-програма за работа во областа на располагање со градежно земјиште во сопственост на РСМакедонија на подрачјето на општина Василево за 2020 година. И овие два предлози го добија потребното мнозинство.

 На денешната редовна 34-та седница, позитивно мислење добија и неколку барања за финансиска помош поднесени од правни и физички лица.

Денес во раните утрински часови екипите на ТППЕ Струмица успеаја да го изгаснат пожарот што вчера избувна во атарот на населеното место Едрениково и набрзо се прошири кон соседното Владевци и регионалниот пат Струмица-Радовиш, опожарувајќи го целиот простор. Гореше сувата трева и нискостеблестата шума што се најде на патот на огнените јазици.

Доцна синоќа преку својот фејзбук профил се огласи градоначалникот на општина Василево Марјан Јанев кој цело време беше на терен заедно со екипите на ТППЕ Струмица кои со часови се обидуваа да го стават под контрола пожарот, кој поради високите температури и сувата вегетација брзо се ширеше.

Меѓу другото  градоначалникот Јанев порача дека ќе инсистира на целосно расчистување на случајот и соодветни санкции.

„Штетите од несовесното однесување на поединци ќе ги трпиме сите. Јавната осуда за овој чин не е доволна и затоа ќе инсистирам на целосно расчистување на случајот и соодветна казна за сторителите. Апелирам до сите да се однесуваат крајно одговорно, бидејќи последиците можат да бидат несогледливи не само по имотите на граѓаните туку да бидат загрозени и човечки животи, нешто што никој од нас не сака да се случи“, објави на својот ФБ профил градоначалникот Јанев.

Денес, во атарот на населеното место Едрениково во близина на Ташли Баир и филтер станицата за вода за регионалниот водовод Василево, Ангелци Градашорци, избувна пожар кој брзо се прошири кон соседното село Владевци. Градоначалникот на општина Василево Марјан Јанев кој цело време беше присутен на лице место, упати апел до граѓаните за крајно внимателно и одговорно однесување но и најави дека ќе бара целосно расчистување на случајот и соодветна казна за предизвикувачот.

„Денес во попладневните часови , кај Ташли Баир, во близина на населеното место Едрениково на неколку места избувна пожар, кој и покрај напорите на противпожарните екипи кои цело време се на терен сеуште не е ставен под контрола и е раширен кон атарот на Владевци. Гори сувата трева и нискостеблестата шума над населеното место Владевци кон атарот на Струмичко Поле. Пред извесно време огнот беше префрлен кај магистралниот патен правец Струмица – Радовиш во непосредна близина на населеното место Владевци, па за регулирње на сообраќајот беше вклучена и полицијата. Во овој специфичен момент како градоначалник на општина Василево кој цело време е заедно со ТППЕ Струмица, единствено ќе кажам дека штетите од несовесното однесување на поединци ќе ги трпиме сите. Јавната осуда за овој чин не е доволна и затоа ќе инсистирам на целосно расчистување на случајот и соодветна казна за сторителите. Апелирам до сите да се однесуваат крајно одговорно, бидејќи последиците можат да бидат несогледливи не само по имотите на граѓаните туку да бидат загрозени и човечки животи, нешто што никој од нас не сака да се случи“, порача градоначалникот на општина Василево, Марјан  Јанев.