Oпштина Василево и општина Струмјани од Р.Бугарија  одржаа Завршна конференција по повод завршувањето на проектот „Инсталирање  обновливи извори на енергија и заштита на животната средина во Струмјани и Василево“,  финансиран од INTERREG IPA Програмата за прекугранична соработка меѓу Р.Бугарија и Р.Македонија, во чии рамки  во општина Василево беше реконструирано основното училиште во с. Седларци, а во општина Струмјани, во најголемото населено место Микрево, поставено е улично осветлување со мерки за енергетска ефикасност. Вкупниот буџет за овој партнерски проект изнесува околу 247 000 евра, од  кои општина Василево искористи околу 50 000 евра плус околу  10 000 евра сопствено учество.

Во училиштето во с. Седларци извршена е замена на старата столарија со нова енергетски ефикасна, поставена е нова термо фасада, инсталирани се  фотоволтаични панели преку кои објектот ќе се снабдува со електрична енергија за сопствените потреби како и санитарна топла вода а  стариот начин на загревање е замент со централно  топловодно греење на пелети. Со оваа реконструкција ова училиште се вброи во редот на енергетски ефикасните, еколошки училишта кои ја штитат животната средина.

Во с. Микрево, општина Струмјани заменети се старите улични светилки со еколошки со што е направена заштеда на трошоците за улично осветлувањењ за 30%.

Градоначалникот на општина Василево, Марјан Јанев заблагодарувајќи им се на  проектните тимови на двете општини за целокупниот ангажман во реализацијата на проектите истите ги окарактеризира како проекти потребни на 21-от век, кои се грижат и ја штитат животната околина“. Тој исто така ја потенцира потребата од продолжување на соработката со општина Струмјани и во наредниот период.  „Се надевам дека и во иднина ќе успееме нашата соработка да ја негуваме и да ја надградуваме со нови успеси и проекти кои ќе им донесат благодет не само на нашите две општини  туку и на регионот пошироко. Заложба на општина Василево  е да го продолжиме нашиот успешен партнерски однос, притоа подеднакво стварајќи квалитет за граѓаните од двете страни на границата.  Партнерствата се убава но пред се корисна алатка која ние досега покажавме дека знаеме успешно да ја користиме. Денешната завршна конференција нека биде само поттик за идни уште поуспешни проекти“, изјави градоначалникот Јанев на денешната Завршна конференција.

Задоволство од соработката  која досега резултираше со два успешно реализирани проекти, изрази и првиот човек  на општина Струмјани, Емил Илиев. „И со овој проект како и со претходниот целта ја постигнавме, заштедивме 30 % на трошоците за улично осветлување. Се надевам дека и во иднина ќе продолжиме да работиме на заеднички проектни задачи, дека ќе најдеме заеднички допирни точки за следниот, трет проект за следниот, трет проект, за доброто на двете општини“.

Денес, Локалниот совет за превенција на општина Василево одржа работна конференција на која релевантните локални фактори расправаа за улогата и значењето на партнерскиот пристап во идентификувањето и решавањето напроблемите на локално ниво.

Претставници од полицијата, од Управата за водење матични книги, од Црвениот Крст, од Дирекцијата за заштита и спасување, Републичкиот центар за управување со кризи, Територијалната противпожарна служба, Основното јавно обвинителство, НВО-секторот, верските заедници, членови на општинскиот совет и општинските јавни институции како и граѓани од населените места на општината расправаа за состојбите во заедница и можностите за надминување на одредени локални проблеми и ситуации со заедничка вклученост на повеќе фактори и во соработка со локалното население.

„Соработката  на локалната самоуправа, полицијата и граѓаните во изнаоѓањето на  решенија за локалните проблеми во која секој од партнерите има конкретна улога во зависност од надлежностите,  претставува основа за подобрувањето на квалитетот на животот на граѓаните“, рече градоначалникот на општина Василево Марјан Јанев кој беше домаќин на денешната Конференција.

Презентација за значењето и суштината на Локалниот совет за превенција,  улогата на градоначалникот како и партнерството меѓу полицијата и заедницата имаше Хризантема Рендевска од отсекот за превенција при СВР- Струмица, која се осврна и на досегашните искуства и практика.

Денес во просториите на општина Василево успешно беше спроведена крводарителска акција во која граѓаните на општина Василево како и многупати досега се вклучија и  ја покажаа својата хуманост на дело. Собраните дваесетина крвни единици се потврда за успешноста на денешната акција во која вообичаено учествуваа вработените во општинската адмнинистрација како и вработени во другите општински институции.

„Крводарителските акции се хуман чин преку кој граѓаните доброволно даруваат крв со цел да помогнат во спасувањето на нечиј живот“, изјави градоначалникот на општина Василево Марјан Јанев, кој го поддржува ваквиот партнерски начин на организирање на крводарителските акции во кои  општината помага просторно и организациски.

Задоволство од текот и резултат на акцијата изјави и претставничката од Црвениот Крст, Заге Каменчева која изрази посебна благодарност до градоначалникот и општината за  успешната организација на денешната акција.

„ Оваа соработка со општината не ни е прва и истата продолжува и понатаму како на различни проекти така и кога станува збор за крводарителски акции. Затоа упатувам голема благодарност до градоначалникот што ни овозможи да ја спроведеме акцијата овде и до сите хумани граѓани и вработени во општината кои ја искажаа својата хуманост преку дарување на крв“, изјави Заге Каменчева од организацијата на Црвен Крст,  Струмица.

Во среда, 11.04.2018 година,  во периодот од 09,00 до 14,00 часот во организација на Општинската организација на Црвениот крст од Струмица, Заводот за трансфузиона медицина и општина Василево ќе се одржи крводарителска акција.

Акцијата ќе се спроведе во просториите на општинската зграда во Василево. Организаторите ги покануваат граѓаните на општина Василево да се вклучат во акцијата и да ја покажат својата хуманост на дело.

Екипата на „Бело Поле“ од Василево се победници на годинешниот Велигденски турнир во мал фудбал што по повод Велигденските празници се одржа во Василево.  Тие во финалето со резултат од 2:1 ја совладаа екипата на Назим од Василево. Третото место го освои екипата на „Енерџи дринк“ од Градошорци а четвропласирани се „Кар шоп“ од Василево.

За најдобар играч прогласен е Трајче Јанев, за најдобар стрелец – Александар Ѓоргиевски, а за најдобар голман – Мики Иванов.

Финалето го следеа и првите луѓе на општина Василево, градоначалникот победниците им ги врачија наградите.

Вкупниот награден фонд на годинешниот турнир  беше 25 000 денари. Организатор на турнирот, кој се одржува секоја година за време на Велигденските празници,  е општина Василево.

Почитувани сограѓани, верници од Православна вероисповед

Од мое лично име и од име на општина Василево Ви посакувам среќни Велигденски празници!

Во деновите кога го славиме големиот Христијански празник, Воскресение Христово – Велигден, кога ја славиме победата на светлината над темнината, на радоста над тагата, победата на вечниот живот преку воскресението, посакувам Божјата светлина да ги исполни Вашите домови.
Да му се  радуваме на животот, да се свртиме едни кон други, да си помагаме и заедно да создаваме.
Радоста на воскресението  нека ги исполни Вашите души со верба и надеж за подобро утре.
Празничните денови нека бидат исполнети со добрина, радост и спокој, нека бидат денови во кои ќе му се посветиме на семејството и најблиските и така сплотени и сложни да му се радуваме на животот.
Почитувани сограѓани во духот на овој ден на радоста и воскресението, Ви посакувам добро здравје, среќа, благосостојба и мирен духовен живот.

Нека ни е честит Велигден
Христос Воскресе – Навистана Воскресе

По повод големиот Христијански празник Воскресение Христово – Велигден, денес, во основното училиште „Гоце Делчев“ во с. Ангелци се одржа „Велигденски сладок панаѓур“  – хуманитарен настан во кој учествуваа учениците од ова училиште заедно со нивните родители и наставници. На училишните клупи претворени во убаво декорирани тезги учениците ги  продаваа своите велигденски изработки,  колачи, велигденски јајца. Како што не информираше наставничката Цвета Костадинова, која заедно со своите ученици беше вклучена во акцијата, во ова училиште организирањето на вакви и слични хуманитарни активности и настани е пракса. На тој начин од најрана возраст ги учат своите ученици да помагаат; кај нив го будат чувството за хуманост и ги учат да даруваат таму каде што има потреба.

Во активноста се вклучи и градоначалникот на општина Василево Марјан Јанев кој како што рече ја почитува големината на таа хумана идеја бидејќи дарувањето е посебен чин кој не облагородува и затоа секој од нас треба секогаш кога е во можност да дарува, да му помогне на другиот, да му помогне на оној на кој му е потребно.

Средствата собрани на Велигденскиот сладок панаѓур ќе бидат донирани.

Денес, со почеток во 16,00 часот ќе започне Велигденскиот турнир во мал фудбал што по повод големиот Христијански празник Велигден, го организира општина Василево. Натпреварите се играат на училишното игралиште на ООУ „Гоце Делчев“ во с. Василево.

Учество ќе земат вкупно 11 екипи од населените места на општина Василево. Денес ќе се одиграат вкупно седум натпревари а можноста први да заиграат и да го отворат турнирот,  по вчерашното ждребање, им припадна на екипите на Енерџи Космос и Дијагонала. За денешниот ден планирани се седум натпревари.

Натпреварите во групи ќе се играат до сабота, четвртфиналните во недела а финалето ќе се одржи во понеделник, вториот ден од Велигден.

Вкупниот награден фонд изнесува 25 000 денари. Награди се обезбедени и за најдобриот  играч, стрелец и голман.

Денес, Советот на општина Василево ја одржа осмата седница и ги усвои сите предлозите од дневниот ред кој на самата седница беше дополнет со седум дополнителни точки. На забелешката од советниците од Советничката група од ВМРО ДПМНЕ дека дневниот ред се надополнува со голем број на дополнителни точки, итноста за истите ја образложи градоначалникот на општина Василево Марјан Јанев. „Станува збор за точки на дневниот ред кои се врзани со рокови односно најдоцна до 31-ви март треба да добијат согласност од Советот, како што се годишните извештаи од Центарот за развој на Југоисточниот плански регион, Годишниот план за вработување и  Правилникот за измена и дополнување на Правилникот за систематизација на работните места на ЈОУДГ „Прва радост“ Василево, како и  одлука и согласност за финасирање на приоритетен проект на општината кој ќе се финансира со средства од ЕУ“, рече во образложението за итноста градоначалникот Јанев.

Советниците ги усвоија и годишните планови за вработување на ООУ„Гоце Делчев“, Василево, на ЈОУДГ „Прва радост“,  и  на општина Василево како и  завршната сметка на ООУ„Гоце Делчев“, Василево.

На оваа седница беа разрешени и именувани членовите на Управниот и Надзорниот одбор на ЈПКД „Турија“, Василево. Образложение даде градоначалникот Јанев  кој меѓу другото рече дека  измените се неопходни поради тоа што  мандатите на досегашните членови на Управниот и Надзорниот одбор се веќе истечени. Нови членови на УО на ЈПКД „Турија“, Василево се: Марија Митрова, Ѓорѓи Костадинов, Павле Ѓоргиев  и Симона Стојанова и Ристо Лазаров – претседател, додека за  членови на Надзорниот одбор се именувани: Петре Партиков, Томчо Јанев, Александар Тимов и Тони Еркечев и  Ристо Велков како претседател.

На седницата беше усвоена и Предлог-програмата  за спроведување на општите мерки за заштита на населението од заразни болести во 2018 година. Советниците ги изгласаа и измени во Комисиите за финансирање, буџет и локален економски развој, во Комисијата за урбанизам, комунални дејности и заштита на животната средина и во  Комисијата за еднакви можности, од каде беше разрешена советничката Сандра Илиева од советничката група на Коалицијата на СДСМ а на нејзино место именуван советникот Атанас Ристов од истата советничка листа. На оваа седница советниците позитивно одговорија и на едно барање за финансиска помош поднесено од ЈЗУ општа болница Струмица.

По повод Велигденските празници, Општина Василево го организира традиционалниот Велигденски турнир во мал фудбал кој  ќе започне во среда на 04 април 2018 година.

Пријавувањето за учество започнува од денес,  26 март (понеделник)  и ќе трае до 04.04 2018 год.  (среда), до 14 часот, по што  во просториите на општинската зграда,  во присуство на претставници на пријавените екипи ќе биде изврешено ждребањето.

Според правилата за учество, секоја екипа треба да брои 10 (десет) играчи.  Право на учество имаат само граѓани од населените места на општина Василево.  Котизацијата за учество изнесува 1000 денари.   Вкупниот награден фонд изнесува 25 000 денари.

Натпреварите ќе се играат на игралиштето на ООУ „Гоце Делчев“ во Василево. Пријавување и подетални информации на телефонскиот број 077 531 592.