Министерството за земјоделство, шумарство и водостопанство ги известува земјоделците кои не се евидентирани во Единствениот регистар на земјоделски стопанства (ЕРЗС), а кои во периодот додека трае забраната за движење во недела 24.05.2020 година и понеделник 25.05.2020 година,  имаат потреба за извршување на земјоделски активности надвор од атарот на своите населени места, неопходно е телефонски да ги известат Општинските кризни штабови во местото на живеење каде ќе ја најават потребата од дневна земјоделска активност.

Потребата за движење за време на викендот, неевидентираните земјоделци треба да ја најават во Кризните штабови, еден ден однапред најдоцна до 20 часот . При тоа треба да дефинираат точно време и место на извршување на земјоделските активности.

Напоменуваме дека Општинските кризни штабови нема да издаваат дозволи за движење, туку само ќе ги евидентираат земјоделците кои го пријавиле своето барање за непречено движење поради извршување земјоделски активности, а потоа списокот на лица ќе биде доставен до надлежните полициски организациски единици (Одделение, Станица, ОВР, СВР).

-Митко Јанев. 071/874-769
-Верче Миткова. 071/631-048
-Павлинка Николова. 077/543-814
-Наско Глигоров. 078/810-312
-Бранко Андонов 071/205/117
-Симона Стојанова. 077/931/587
-Горан Андонов. 071/239/344

Согласно мерките на Владата на Република Северна Македонија за дополнителните ограничувања на движењето, Кризниот штаб на општина Василево ги информира економските оператори (маркети и здравствени аптеки) на територијата на општина Василево, кои сакаат и имаат услови да работат за време на полицискиот час, да достават БАРАЊЕ до Кризниот штаб на општина Василево.

Барањето кое е составен дел на ова известување, пополнето, со потпис од одговорното лице и печат од фирмата треба да се достави до Oпштинскиот кризен штаб кој ќе врши прием во просториите на Општина Василево, на ден 23.05.2020 година (Сабота) од 11часот до 14 часот.

Економските оператори кои не се во можност барањето да го преземат од веб страната на општина Василево, истото може да го подигнат во просториите на општина Василево, на лице место да го пополнат и веднаш да го достават.

Дозволите за работа се издаваат веднаш по внесувањето на Барањето.

Работата на овие субјекти ќе биде исклучиво преку нарачки по телефон или интернет комуникација и достава на производите/продуктите до домот на граѓаните

Телефонските броеви и контактите на економските оператори кои ќе побарат и добијат дозвола за работа за време на полицискиот час ќе бидат објавени на официјалниот веб сајт на општина Василево и на општинската ФБ страна.

За сите дополнителни информации граѓаните може да се обратат на следните телефонски броеви:
070 598 748
071 874 769

Барање за дозвола за работа

На денешната Владина седница донесена е  одлука за зголемена рестрикција на движењето на граѓаните за време на претстојниот празничен викенд, односно за периодот од недела, 24.05. 2020 г.  до вторник, 26.05 2020 г.

Согласно Одлуката им се  забранува движењето на сите граѓани на целата територија на државата почнувајќи од недела, 24 мај, во 11,00 часот до вторник, 26 мај, до 05,00 часот.

Во сабота, на 23 мај, забраната за движење останува иста како и за сите други денови и ќе трае  од 19 часот до 05 часот наутро наредниот ден.

ЈПКД „Турија“, Василево ги известува сопствениците на стопански објекти во  индустриската зона Василево, кои ја користат услугата  „подигање на смет“,  дека сметот од нивните објекти, наместо во понеделник, ден во кој вообичаено се подига,  ќе биде подигнат во сабота на 23.05.2020 година.

Причината за ваквата промена  е поради тоа што понеделник, 25.05.2020 година е неработен ден.

Промената е еднократна и се однесува само за наведениот термин, што значи во иднина сметот од индустриската зона ќе се подига како и досега, во понеделник.

Кризниот штаб при Општина Василево апелира до граѓаните на Општина Василево , а особено до граѓаните на населеното место Градошорци да се воздржат од славење на верскиот празникот „Свети Никола” како селска и домашна слава. На тој начин   ќе го избегнат групирањето на лица (повеќе од две),  ќе се однесуваат одговорно и ќе ги почитуваат сите донесени мерки и препораки на Владата на РСМ и Министерството за здравство во поглед на спречување на ширењето на вирусот COVID-19 и за заштита на јавното здравје.

Од Општинскиот кризен штаб  оочекуваат разбирање од страна на граѓаните и порачуваат:Здравјето пред се!

Денес , локалната самоуправа Василево и Општинскиот кризен штаб, поделија 200 пакети хуманитарна помош на семејства со социјален ризик, со што ја финализираа започната донација од 500 хуманитарни пакети – донација од семејството Заеви, која се одвиваше со посредство на Здружението за хуманитарни цели „Сите заедно можеме“.
„Како локална самоуправа и Општински кризен штаб, наша обврска е постојано, а особено во вакви кризни состојби, како што е моменталната предизвикана од Коронавирусот COVID – 19, да им помагаме на нашите сограѓани кои се посебно погодени, за да можат полесно да се справат со егзистенцијалните проблеми. Благодарни сме за донацијата од семејството Заеви со која директно помогнавме на 500 семејства, покажувајќи им дека и во вакви тешки моменти не се сами. Сметам дека ова е пред се наша човечка должност и апелирам до сите кои се во можност да помогнат онаму каде што е најпотребно.“, изјави првиот човек на општина Василево и Општинскиот кризен штаб, градоначалникот Марјан Јанев.

Со полагање свежо цвеќе пред бистата на Атанас Нивичански , денес основното општинско училиште од Нова Маала кое го носи името на овој локален војвода го одбележа својот патрон празник.

Пред бистата на патронот се поклонија делегации од училиштето и локалната самоуправа Василево под чии ингеренции е ова училиште.

Основното општинско училиште „Атанас Нивичански“ е основано во 2012 година и во негов состав се и подрачните училишта во населените места Добрашинци, Чанаклија и Висока Маала.

„Според Уредбата со законска сила за примена на Законот за основно образование за  време на вонредна состојба, уписот на учениците во прво одделение за учебната 2020/2021 година, ќе се реализира во месец  јуни“, известуваат од ООУ „Гоце Делчев“, Василево.
За упис потребни се се следниве документи:
– извод од матична квига на родени (за детето);
– потврда за примени вакцини ( од ЈЗУ Здравен дом, Струмица, одделение за вакцина);
– лична карта за идентификација на родителот;
– потврда од стоматолошки преглед издадена од надлежната здравствена установа;
Уписот ќе се врши за деца родени од 01.01.2014 до 31.12.2014 година родени до 31.01.2015 година по барање на родител и мислење на стручната служба.
Подетални информации родителите можат да добијат на телефонските броеви: 071 392 – 840 (директор) и 078 347 -684 (психолог).

Денес, членовите на Кризниот штаб на општина Василево во хуманитарна акција на терен поделија 300 (триста) пакети со прехранбени производи, кои општина Василево ги доби од семејството Заеви. Пакетите со прехранбени производи се поделени низ населените места на општина Василево, на семејствата со социјален ризик, чија материјална состојба дополнително беше влошена поради пандемијата со COVID – 19.

„Во овие моменти кога сите се соочуваме со последиците од новонастаната состојба, наша, пред се човечка должност е да им помогнеме на оние на кои во моментот тоа им е најпотребно, да ја покажеме нашата солидарност и хуманост и со заеднички напори да направиме се што е во наша можност за полесно да го пребродат овој тежок период, кој особено ги погоди најсиромашните поединци и семејствата со социјален ризик“, е ставот на градоначалникот на општина Василево Марјан Јанев, кој заедно со членовите на Општинскиот кризен штаб, целосно почитувајќи ги мерките и препораките од надлежните, помагаа онаму каде што е најпотребно.

Градоначалникот на општина Василево Марјан Јанев,  ја донираше априлската плата. Имено,  согласно јавно даденото ветување, дека наспроти Одлуката на Уставен суд да се укине Владината уредба – функционерите, пратениците, обвинителите, судиите за април и мај да земаат плата од 14 500 денари,  тој се откажа од делот од платата над 14 500 и истиот го донираше во Фондот за борба против COVID – 19.

„Јас сум против Одлуката на Уставен, ќе земам минималец а разликата ќе ја уплатам во Државниот фонд за помош“, изјави Јанев по донесувањето на Одлуката на Уставниот суд за укинување на Владината уредбата, а деновиве ветувањето го реализираше. „Треба да помагаме тогаш кога е потребно и овој мој чин е токму во оваа насока. Сега е време кога е неопходно да бидеме солидарни и секој согласно можностите да даде свој придонес во надминувањето на оваа состојба предизвикана со пандемијата со Коронавирусот, COVID – 19, “ изјави  градоначалникот Марјан Јанев во врска со  донирањето на својата плата.

„Само заедно, со подадена рака ќе успееме да го надминеме овој тежок период!

Време е за солидарност“, порача Јанев